Speedway Diner 親子玩樂體驗套餐 - Captain Wong

好開心可以參加九龍城廣場的speedway的試玩體驗。一入到餐廳，睇到個場，有啲驚訝，估唔到可以一邊食野，一邊可以望著個賽車場。之後，有位服務員好熱情咁招呼我地坐低。因為爸爸遲收工，要遲啲先到，服務員話可以人齊先叫佢上菜，怕野食攤凍唔好食，好細心。之後比左3張車飛我地，教我點樣去登記玩賽車，仲好詳細咁介紹大中細三款賽車嘅分別。爸爸黎到之後，我地登記完賽車就叫上菜。野食黎得好快，都好好食，尤其係個牛肉漢堡，沙律都唔錯。食飽之後，岩岩好賽車果邊叫嘜，輪到我地玩。阿妹有啲興奮同緊張，因為佢都係岩岩夠高玩大人車。帶左頭盔就上車，工作人員仲詳細咁講解左點樣操控架車，就各自出發啦。原來架車馬力都唔細，去到轉彎位時真係有飄移嘅感覺，阿妹仲說個人就快要被飛出去嘅感覺，又刺激又好玩。雖然玩得6分鐘，但都轉左好多個圈，夠曬皮。玩完坐返埋位休息嘅時候，餐廳服務員仲介紹埋平日同假期嘅套餐收費，話比我地聽最抵玩嘅方法，下次有時間都再黎玩先！