紙飛機親子空間 Origami Kids Cafe 試玩體驗 - YamiKwok

多謝紙飛機比機會我同劉星宇bb黎試玩❤️
紙飛機親子餐廳 Origami Kids Cafe 位於啓德郵輪碼頭，所以餐廳外既環境好靚仲可以望到海，劉星宇bb一上到R層已經勁開心嘣嘣跳咁😆入到紙飛機之後更加係進入瘋狂狀態呀!!!
一入到紙飛機就直衝兒童玩樂區!有好多動物毛公仔,超鐘意貓狗既劉星宇即刻孭住隻狗狗週圍走,行前d有3隻好得意既馬馬,劉星宇揀左隻白色既馬馬騎🐴,紙飛機好西利,白色既馬馬都可以keep到咁乾淨新既一樣呀!馬馬隔離既玻璃窗係有防撞條架,煮飯仔既位都有防撞條,咁就唔怕小朋友撞到d邊角位,安全好多呀!BB見到前面木粒池之後真係不得了呀!玩到唔肯走!抱佢走佢又自己爬反入去!!!木粒池d木粒有d似骰仔,用玩具鏟同鉗將木粒裝滿玩具膠筒又倒返出嚟不斷重複都可以令劉星宇玩得好滿足🥰!不過同bb一齊玩既途中要留意住防止佢誤食木粒啦。木粒池有上層架,望落好似樹屋,入面有好多車仔玩。木粒池隔離有個木製滑梯,第一次見滑梯係木製既好特別喎!bb二話不說就快速爬上樓梯行過去滑梯度,我發現木制既樓梯係無膠樓梯咁滑腳,所以BB先會比平時爬得更快速,快到嚇親媽媽呀哈哈!咦~員工姨姨過黎提我地野食上齊,食嘢先!
劉星宇係好鍾意食黑松露,所以叫左個黑松露炒飯比佢,炒飯好香!!!劉星宇勁鍾意食,追食仲嫌棄我餵得慢佢自己拎起匙羹食🤣,既然佢咁懂事自己食,我就食叫比自己既水煮牛肉鍋同宮保雞丁啦。劉星宇食飽飽就即刻要去玩,所以俾佢去近我地座位既煮飯仔區玩,咁我就可以邊食邊望住佢啦。
玩煮飯仔第一時間緊係推車仔買餸先啦!哇!D食物既像真度好高,由其是水果,玩具奇異果上面有毛好似新鮮水果咁。劉星宇揀佢最鐘意食既魚喎,一條兩條三條,放到架車仔滿左都仲係要拎魚,搞到d魚跌咗落地,我叫佢執返d魚魚!快d執!然後紙飛機既員工姨姨幫劉星宇執魚魚仲同我講小朋友係咁樣架,咁得佢整跌啦無所謂,之後仲同劉星宇玩等我有時間食埋靜底既野,姨姨同劉星宇分享包包同三文治🥪。d包包又係勁真,我扮撕一啖包包比BB食,BB打開口發現自己食空氣唔開心覺得我呃佢🤣,真係好好笑,我同bb都玩得好開心。咁好玩緊係唔可以比佢停!接住黎既係梯田!劉星宇又係9秒9爬左上去,點解bb你黎左紙飛機之後行動會咁迅速,真係震驚左我幾次。梯田上面有d公仔,劉星宇玩左公仔一陣係梯田爬上爬落又爬左1陣就過反另一邊玩。
劉星宇幾鍾意紙飛機間帳幕屋仔,出出入入左幾次,跟住就係隔離玩照顧bb公仔啦。估唔到一歲3個月大既BB會識照顧d玩具BB🥺,餵玩具BB食奶又推玩具BB坐BB車行街街,仲玩具BB打千秋,打打下劉星宇自己都想爬上千秋好搞笑,個千秋係比玩具BB玩架。玩完玩具BB再坐下車車,釣下魚魚,之前無同BB玩過釣魚遊戲,估唔到佢玩一次就識咁叻!之後劉星宇又想返木粒池玩,依個木粒池真係好吸引到小朋友呀!玩左咁耐,劉星宇都放晒電開始攰啦,我地準備走既時候發現原來紙飛機有partyroom,好適合同一班朋友仔開party喎!
今次同劉星宇黎紙飛機玩之後覺得紙飛機白色調既裝修令人好舒服,遊戲區既玩具好益智豐富,種類非常多樣性,可以幫助激發到小朋友既行動同反應。員工們都好nice,店內衛生乾淨,食物味道都唔錯,好適合帶埋小朋友一齊黎放電,順便互動學習下!