紙飛機親子空間 Origami Kids Cafe 試玩體驗 - szehangy
好開心抽到紙飛機親子餐廳 Origami Kids Cafe 嘅試玩，餐廳雖然0係九龍灣郵輪碼頭，但其實搭巴士、小巴甚至自己揸車都好易去。今次我地就揸車去，去到郵輪碼頭泊好車搭升降機就可以直達親子餐廳。停車場每小時都係$10，比起其他大型商場，相對平好多~我地今次book 左16:45 -18:45時段，星期一至五唔算多人，場內設備好新淨，玩具同遊戲區都算多，又有足夠嘅地方俾小朋友放電。值得一提嘅係場內職員都好nice, 好有耐性同詳盡咁介紹收費，有時我小朋友玩得興奮時叫得太大聲，或者冇即時放好玩具先走，職員都好友善同了解。同埋場內遊戲區都有軟墊，大人小朋友可以放心玩。餐廳仲好貼心為有需要嘅大人小朋友提供拖鞋。總體黎講，今次試玩，小朋友玩得好開心 (玩到唔捨得走) 大人食野食得好滿足 (食物質素比想像中好好多，同埋有好多選擇)。好開心嘅一次體驗，希望下一次再有機會參加類似試玩!~
餐廳內提供唔同種類嘅食物同飲品(主菜、小食、甜品等等)中式、西或任君選擇。味道都符合返小朋友比較清淡，唔似出面餐廳勁重味精，令人食到好口乾。而且最令我驚喜嘅係竟然有啤酒選擇(一直感覺親子餐廳唔會有酒精飲品)，但紙飛機好貼心，除左小朋友，都考慮同照顧到大人嘅需要。
我地叫左一碟黑松露炒飯(太肚餓唔記得影相)，雪糕吐司，一枝果汁，一枝啤酒同一杯黑糖咖啡。初時對親子餐廳嘅食物冇咩期望，以前去過嘅親子餐廳都係注重小朋友兀玩嘅空間，食物質素係次要。但今次食物嘅質素真係超乎我想像，同外面餐廳有得比! 尤其我杯咖啡，咖啡味好濃，唔係普通用咖啡粉開嘅即沖咖啡。順帶一提小朋友除左水同果汁，都可以飲babyccino (因為係免費提供架~)
餐廳環境光線充足，設施乾淨，進食地方於餐廳中心，大小可以一邊食，一邊睇住小朋友0係旁邊遊戲區玩
好大型嘅煮飯仔區，所有小女孩見到都心心眼~~
除左遊玩區俾小朋友放電，仲有閱讀區提供圖書同顏面筆同畫簿俾小朋友畫畫
我小朋友最鍾意玩嘅地方就係呢個檜木塊池，D木塊質地軟軟地，唔會整到小朋友，小朋友當呢個係波波池，玩攰左仲成個人訓0係度，好舒服~~
小朋友另一最愛- 滑梯! 雖然滑梯唔係好斜，但好滑，小朋友覺得好刺激，滑完一次又一次~
除左大人洗手間 (洗手間好闊落，女廁亦好多廁格)，亦有傷殘人士洗手間，哺乳室，方便母乳媽媽同幫小朋友換片，洗水盆都符合小朋友高度，可以俾佢地自己洗手。
我小朋友同其他小朋友都玩得好開心，除左自己玩，場內亦都適合小朋友一齊玩嘅設施同玩具~
餐廳內有唔同嘅遊戲區同玩具小朋友玩，仲有唔同嘅costume俾小朋友cosplay添~