BABE HERO 寶貝童盟 - 親子試玩體驗 - Yeung Tsz Yan
趁住上星期六得閒，預約咗BABE HERO 寶貝童盟 – 親子試玩體驗試用中心活動。位於官塘柏秀中心的Babe Hero，係正apm隔離，非常容易找到。一家三口係apm食咗lunch之後，就行過去玩。
一入去去，見到個場好寬躺，d玩具擺放得好整齊，重點所以玩具都係木質！霖霖除完鞋，一支箭跑咗去煮飯仔嗰度，成枱放滿不同煮飯仔用具，睇到霖霖雙眼發光～
煮咗一輪飯仔之後，霖霖發現咗一個大型超級市場。入面有佢最鍾意嘅手推車，完全適合小朋友嘅高度。霖霖當正自己去shopping咁，不停放蔬菜水果入架手推車度。佢一時扮收銀員，一時扮顧客，忙到成場走。
轉個頭，霖霖已經跑咗去場嘅另一邊。另一邊係角色扮演房間，一共有6種扮演。霖霖第一個體驗係餐廳侍應，著上制服，拎住餐牌，認真咁serve我同爸爸。餐牌上面有3款set，有沙律、漢堡同埋甜品雪糕。所以嘢食都係要自己配搭，發揮創意～
第二個場景係做畫家，著起圍裙，戴起畫家帽，霖霖成個人文青晒！地下鋪咗一張大畫紙，牆上亦有一塊大玻璃，等小朋友發揮想像力～
跟住嚟到霖霖最期待扮演嘅醫生⋯⋯一入到去，成個醫院場景岀晒嚟，著去醫生手術袍戴上醫生配件，霖霖當正自己真係醫生。走去睇x-ray，然後幫bear bear包紮，再搬上擔架床～
然後，霖霖化身考古學家。首先，係波波池搵恐龍蛋，跟住再係考古場發掘恐龍化石。霖霖唔認識咩叫考古學家，從未試過要咁樣用掃仔揾骨頭，對佢嚟講係一個好新鮮嘅體驗～
隔離就係貨倉場景，霖霖著起工地服裝，岀盡全力拉d包裝箱上去，然後爸爸係上面接貨。隔離有條長滑梯，可以瀡返d箱落去。霖霖上上落落玩咗十幾轉，係一個好好消耗體力嘅遊戲～
最後一個場景係扮消防員。平時霖霖係街見到消防車，已經停晒係度睇。今次有得扮消防員，簡直係滿足佢cosplay嘅一大願望。呢個場景係一個撞車場面，要係撞車場入面救岀bear bear，跟住用索帶拉隻bear上去，又係培養霖霖同爸爸合作嘅機會～
3個鐘好快已經完結，霖霖勁唔想走，最後要哥哥送上貼紙先肯離開。過咗咁耐，霖霖仲不停問我下次幾時可以再去扮醫生、消息員嗰度玩⋯⋯