BABE HERO 寶貝童盟 - 親子試玩體驗 - Debbie Wong

星期日帶阿囡去左位於觀塘柏秀中心嘅Babe Hero 試玩，我地揀左10:00-12:00呢節時間，可能時間尚早，所以冇乜人，放完鞋之後都有做指定動作 – 幫小朋友量體溫同消毒雙手，入面有幾個模擬情境室 – 有超級市場、畫室、做醫生、貨倉、尋找恐龍化石、做消防員、做侍應等等，阿囡始終鐘意喺超市掃貨，阿囡仲細，所以仲未識根據我板上嘅要求去執食材，但我口講要嘅野，阿囡都執到比我，而且相當認真呢！有間房有波波池，入面有架車，阿囡都好鐘意，可惜係壞嘅，開唔到，冇聲冇燈，阿囡仲繼續不停咁按，睇得出阿囡有D失望，希望下次再去時，架車可以開到啦！每間房都有相應嘅小制服，小朋友著起呢D制服真係好得意，我同老公瘋狂咁影佢嘅制服相，人仔細細咁，好得意呀！！如果幾個情景室唔岩玩或已經玩完，出返黎中間位置都有D益智遊戲玩，適合唔同年齡嘅小朋友。另外安全問題都係大家關注嘅事情，角位同喉位我見都有做安全措施，呢樣係Playroom 基本需求，始終係小朋友玩嘅地方，有損傷就大家都唔想。今次試玩，整體上都滿意，但都有少少改善嘅地方，例如空調唔係好夠，有少少焗嘅感覺，不過其後可能多人少少就有開返大D，另外因女兒仍要換片，如入場時職員可先主動話比客人知更換尿片嘅地方就更貼心，但當然我地問嘅時候，職員都有禮貌地指出換片地方。