全新升級 AXE Supra 超濃縮洗潔精 - annie_bear
一直都唔會話自己係咩環保人士，其實做到就做，做唔到唔強迫。出街買飯自備盒仔同飲品杯一向有做，而啱啱加入呢個家庭嘅BB都係環保片片用家。不過如果講到要用酵素洗潔精之類，恕我難以奉陪，因為真係洗得好唔乾淨，成日用完都仲係成陣油，有時用埋熱水洗，感覺都係好唔乾淨。因為咁，我都好討厭洗碗……
咁啱得咁橋，有一日發現AXE有新產品「AXE Supra 超濃縮洗潔精」試用，報稱「可生物降解和無磷配方」，有呢種「懶環保」概念嘅產品，梗係想試下。（咁當然，係咪真係環保就真係唔知，都係嗰句，盡做啦）收到呢支洗潔精試用裝嘅時候，第一個感覺，個包裝設計都幾吸引，望落都有種清新嘅感覺，而且泵裝設計，用嗰陣唔使成支拎起，都好似幾方便。
最緊要係，因為平時都鍾意食辣，啲碗碗碟碟少不免痴住曬啲辣油，好難洗，但係用呢支洗潔精，竟然可以迅速去除油污，真係用泡泡輕輕一抹再沖水就乾淨曬，令到洗碗嗰陣心情大好！（雖然個柚子香味對我嚟講實在太勁，唔講以為自己沖咗杯柚子茶放係隔離，不過洗完碗，呢種香味都會完全消失，所以應該係無殘留氣味嘅。）
而產品報稱「加添天然萃取海藻糖」、「升級護手」，咁我本先都唔係太注重護理嘅人，暫時就覺得so far so good，至少無洗完碗「乾爭爭」嘅感覺。至於會唔會繼續用啦喎，希望AXE快啲出補充裝，咁我就可以永續使用呢個試用樽 =)