大樹先生的家 Mr. Tree 試玩體驗 - Zoey Cheng
大樹先生的家分左幾個時間，我地揀左12點至3點的時間。雖然openrice係寫12點半先開始，但實際上12點已開店，所以我地12點15分去到，大樹先生先開店。因為是平日同比較早，我地見無咩人即刻去影相。
最令我心心眼既係大型波波池同滑梯。因為波波池是以藍色為主，好似置身係大海一樣。同時，它又有啲游泳圈係波波池到，唔少小朋友都拎住黎游水。我地拎左個細既游泳圈俾囝囝，佢好似大力士咁托住個游泳圈不停係個波波池到行，但好快又被啲波波池淹埋。
我係網上見到荔枝角大樹先生岩啲細年齡既小朋友，因為有個係0-24個月遊戲區，裡面仲有1個盪鞦韆，我見到都好想玩。囝囝一見到，就爬爬爬行行行過去。但到我地放囝囝上去，囝囝就好似隻蝦仔咁郁黎郁去要落去。我地係到卡卡笑這隻蝦囝。
中央有1個遊戲區，裡面煮飯仔玩，唔係好細、得啲零件，而係一座座，仲要有好幾個，小朋友唔洗同人爭。又有1個專屬corner係列車同埋屋企玩具，又係1座座好多個。
但令人有啲失望既係衣服區，因為網上話有好多款既衣服俾小朋友換上。但去到的時候，只有十多套，而且男裝款得幾套，大多數都是公主款。衣服都不是一套放好，我地需要左找找右搵搵先搵到一套俾囝囝。
仲有一個唔可以唔提的是沙池。沙池踏上去好涼好舒服，坐上去好舒服，啲沙係幼細的。裡面仲提供挖沙既工具。又想同小朋友享受沙灘之樂，又唔想太熱，這裡就好岩了。而且大樹先生仲預備左風筒俾大人同小朋友清潔。
玩左咁耐，係時候食野啦！！！！作為親子餐廳，大樹先生的家的設備是可以的。有一個開放式的洗手盆、high chair、bb餐具都有，但價錢就比較貴。可能包括埋入去遊戲室的費用。但大樹先生的家的食物真是不錯。特別是大人的食物。哈哈。
我地叫左一set蕎麥麵、一個牛扒try try. 而囝囝就同我一齊share 蕎麥麵同雞卷。唔知係咪岩bb口味，我覺得蕎麥麵同雞卷都比較淡味。反而牛扒比較軟滑好味。正呀！！
最後，因為囝囝玩得好開心、又好盡力，結果，一離開大樹先生的家，囝囝就訓左。