大樹先生的家 Mr. Tree 試玩體驗 - Theresa Leung
汪汪一歲啦！為左慶祝，就帶左bb黎到銅鑼灣嘅大樹先生的家happy下。玩之前，當然要醫飽個肚先啦！因為之前都去過幾間親子餐廳，食物嘅味道都係麻麻，所以我原本都冇期待有好野食。但係，大樹先生的家啲野食真係好好味！當日叫左燒春雞配帶子同埋豬鞍配燒菠蘿。隻雞外脆多汁，帶子大大隻非常鮮甜，豬胺啖啖肉。菜牌上面仲有幾款兒童餐，選擇比較多。未夠大嘅bb都有得叫野食架，個餐有果蓉同餅餅等等。爸爸媽媽帶bb黎都唔洗帶咁多野黎，又粥，又匙羹咁論盡。
食飽飽當然要去做最重要嘅野啦！就係，玩！玩！玩！大樹先生的家有一個超級靚嘅波波池，全部波波都係紫色架！超鐘意！波波池入面當然唔少得小朋友最鐘意嘅滑梯啦！汪汪玩得超開心！
雖然大樹先生的家地方唔係好大，但玩嘅種類十分齊全及全面，繩網區、積木區、路軌玩具，應有盡有。最特別嘅係有唔同嘅公主衫、動物衫俾小朋友cosplay。汪汪媽都忍唔住要俾汪汪扮係米妮，真係好得意。
因為汪汪岩岩先一歲，行都未識行，好多遊戲區都唔岩佢玩，所以每次都親子餐廳都會帶佢去bb區都玩。今次都唔例外，去左以太空為主題嘅0-24個月健身專區。呢區嘅燈用左幾盞月球吊燈，汪汪媽心心眼即刻出現。見到媽咪摸住盞燈打卡，汪汪都唔執輸，要爸爸抱佢摘月亮。而汪汪係呢區最鐘意玩就係bb千秋，係其他地方真係見唔到。
另外，大樹先生的家仲有得俾小朋友釣魚同撈魚架。雖然唔係真嘅魚，但真係吸引左唔少小朋友去玩，睇黎玩水嘅魔力對小朋友黎講真係好大。未夠大嘅bb都想玩水，就可以好似汪汪咁坐低玩下水，落手落腳咁捉下魚，爸爸媽媽仲可以玩埋一份釣啲魚俾bb玩。
總括而言，汪汪媽十分推薦呢間親子餐廳，坐得舒服，野食好味，遊戲種類齊全，設施新淨安全，性價比高。