Speedway Diner 親子玩樂體驗套餐 - SauSauSau
小朋友超鐘意車車，亦成日坐親人嘅車，今次終於有機會俾佢體驗下Speedway Diner 揸車！
因為係試玩關係，只能約平日，所以揀咗星期三夜晚去，所以現場顧客不多，唔洗等好耐就有得玩。先嚟睇下餐廳環境–
1. 起碼有60-70個位，但入面都好闊落，仲有夾公仔機、小朋友遊戲機、射籃球… 大人細路都啱玩
2. 有部份賽道靠近座位區，可以一邊食一邊睇其他人揸車。
入到去會先俾張飛你，係用嚟book揸車時段嘅。如果現場好爆好多人嘅話，建議一入去book咗先，再坐低慢慢order嘢食。今次食物方面有夏威夷pizza, burger, 沙律, 肉醬意粉。味道和質素比想像中好，特別一提pizza係超薄批，脆脆地小朋友鐘意食到自己食咗大半個！我自己就最鐘意肉醬意粉，辣辣地好開胃。Burger肉質也不錯。
去到玩車時間！共有3類車可以玩，按參加者嘅高度劃分。小朋友唔夠120cm高，只可以玩電動的BB車 。120-140cm的可以玩小車 (雖然細啲但都幾快)，140cm以上 (包括大人) 就可以玩大車。講返BB車，速度都係十分之慢的，小朋友有足夠時間扭軚，家長係可以係賽道上一路陪住小朋友的，所以係好安全嘅。同埋現場有好多工作人員睇住，相當放心。
見佢玩得咁開心，搞到我都想去玩返轉！好彩有朋友一齊嚟，交俾佢睇住小朋友之後就去
總括而言呢個場都好considerate，有唔同設施俾唔同歲數嘅小朋友玩，就連大人都好啱玩。值得encore！