Fisher-Price 安撫睡眠小水獺 - minichoco

試用產品: Fisher-Price安撫睡眠小水獺

由出世到而家，主要由爸爸去安撫BB女瞓覺。每一次BB都要喺爸爸嘅懷抱入面先容易瞓到，可能因為喺爸爸懷抱入面有安全感啲。

BB越大，佢喺瞓之前就越扭計，喊到拆晒天，通常都要扭半個鐘到先至可以瞓得着，每一次瞓着咗放低落床嗰一刻都要好小心，因為好容易佢又會醒返，試過好多次醒返又要再氹佢瞓覺，加上佢越嚟越重，爸爸有時都冇咁好心機氹佢瞓，抱到隻手都酸埋。

長此落去都唔係辦法，我哋試過就咁將佢放喺床，等佢自己喊到瞓，但佢好多時都起碼要喊半個鐘頭先瞓得着，我哋又唔忍心睇住佢喊咁耐，所以今次apply到呢一個水瀨公仔好開心，我哋都係抱住試吓嘅心態睇下可唔可以安撫到佢瞓覺。

呢個Fisher-Price安撫睡眠小水獺非常好，因為佢係可以拆出黎洗嘅，就算小朋友係咁咬隻公仔，搞到隻公仔勁多口水都好，都唔使擔心清潔唔到，另外我好鍾意佢嗰個心跳聲/呼吸聲嘅功能，佢會發出模仿嘅心跳聲/呼吸聲，BB聽住啲聲嘅時候真係穩定啲，加上公仔內柔和嘅燈光，令到BB轉住望住個燈光，有助穩定佢嘅情緒。我地依家係搵呢隻公仔陪寶貝女瞓覺，佢真係會好專注望住啲燈光，慢慢自己就瞓着咗。

再者，每個小朋友都有啲公仔陪佢成長㗎啦，就算再大啲，呢個公仔都仲用得着。我會推薦有小朋友嘅朋友仔都可以用呢個產品。